کراچی: سندھ اسمبلی میں قائد حزب اختلاف حلیم عادل شیخ نے فائرنگ سے کمسن بچی حرمین کے جاں بحق ہونے پر دکھ کا اظہار کرتے ہوئے افسوسناک واقعے میں ملوث ملزمان کے خلاف فوری کارروائی کا مطالبہ کیا ہے۔
ضلع ملیر کے علاقے شاہ لطیف ٹاؤن میں گزشتہ رات 4 سالہ بچی حرمین گولی لگنے سے جاں بحق ہوئی تھی اور پوسٹ مارٹم کے لیے جناح اسپتال میں خاتون میڈیکو لیگل آفیسر کی عدم دستیابی کے باعث اس کی لاش 12 گھنٹے سے زائد عرصے تک مردہ خانے میں پڑی رہی۔
حلیم عادل شیخ نے جناح اسپتال پہنچ کر متاثرہ خاندان کے افراد سے ملاقات کی اور افسوسناک واقعے پر دکھ اور غم کا اظہار کیا اور سوگوار خاندان سے ہمدردی کا اظہار کیا۔ انہوں نے متاثرہ خاندان کو انصاف دلانے کے لیے ہر ممکن تعاون کی یقین دہانی بھی کرائی۔
حلیم عادل شیخ نے اس موقع پر میڈیا کے نمائندوں سے بات کرتے ہوئے کہا کہ ضلع ملیر میں میڈیکو لیگل کی سہولت میسر نہیں اور مضافات میں رہنے والوں کو قانونی تقاضے پورے کرنے کے لیے جناح اسپتال آنا پڑتا ہے۔ انہوں نے کہا کہ یہ افسوسناک بات ہے کہ متوفی بچے کی لاش 12 گھنٹے سے زائد عرصے سے مردہ خانے میں پڑی ہے اور سوگوار لواحقین ڈاکٹر کا انتظار کر رہے ہیں۔
انہوں نے بتایا کہ ناظم جوکھیو کے قتل سمیت قتل اور عصمت دری کے دیگر کئی مقدمات میں بھی یہی صورتحال دیکھی گئی۔ حلیم عادل نے کہا کہ سندھ میں امن و امان کی صورتحال قابو سے باہر ہے اور قانون کی پاسداری کرنے والے شہریوں کو جرائم پیشہ افراد اور بااثر افراد کے رحم و کرم پر چھوڑ دیا گیا ہے۔ انہوں نے کہا کہ کراچی میں ڈاکوؤں کا راج ہے اور شہر میں اسٹریٹ کرائمز اور ٹارگٹ کلنگ معمول کا منظر ہے۔
حلیم عادل شیخ نے سندھ میں لوگوں کو انصاف کی فراہمی میں رکاوٹ کے طور پر ایس ایچ او ایم ایل او گٹھ جوڑ کی نشاندہی کی اور کہا کہ جب کوئی بااثر مجرم کے ہاتھوں کسی پر حملہ یا مارا جاتا ہے تو پولیس نہ تو لیٹر جاری کرتی ہے اور نہ ہی مقدمہ درج کرتی ہے جبکہ پوسٹ مارٹم اور طبی معائنے سے بھی انکار یا تاخیر کی جاتی ہے۔
انہوں نے کہا کہ رشوت کے خلاف جعلی میڈیکل رپورٹس جاری کی جاتی ہیں اور یہاں تک کہ لیبارٹری شراب کو شہد میں بدل دیتی ہے۔ حلیم عادل شیخ نے کہا کہ دہشت گردی اور پولیس کی زیادتیوں کے بعد معاشرے میں ڈاکٹروں کی بدمعاشی شروع ہوگئی ہے اور انہوں نے وزیراعلیٰ مراد علی شاہ اور چیف سیکریٹری سندھ پر زور دیا کہ وہ صوبے میں تشویشناک صورتحال اور عوام کو درپیش سنگین مسائل کا تدارک کریں۔
انہوں نے حکومت سندھ سے مطالبہ کیا کہ ہسپتال میں آبادی کے تناسب سے لیڈی ایم ایل اوز کو مناسب تعداد میں تعینات کیا جائے تاکہ قانونی تقاضوں کو کم سے کم وقت میں پورا کیا جا سکے اور لوگوں کو زیادہ تاخیر کا سامنا نہ کرنا پڑے۔
