لاہور: ایڈووکیٹ سپریم کورٹ لطیف کھوسہ کے گھر فائرنگ کی گھتی سلجھ گئی اور فائرنگ میں ملوث سابقہ ریکارڈ یافتہ اور پیشہ ور شوٹر محسن عرف لمبا گرفتار کرلیا۔
ملزم محسن نے اعترافی بیان دیتے ہوئے کہا ایک سیاسی جماعت کے رہنما زبیر خان نیازی کے کہنے پر اپنے ساتھی کے ہمراہ لطیف کھوسہ کے گھر فائرنگ کی اور زبیر خان نیازی نے اپنا ایک بندہ نشاندہی کے لیے ساتھ بھجوایا، جس نے لطیف کھوسہ کا گھر دکھایا۔
دس لاکھ روپے میں معاوضہ طے ہوا، ملزم ایک لاکھ روپے ایڈوانس وصول کر چکا تھا اور ملزم بھی سیاسی جماعت کا کارکن ہے اور جلسے/جلوسوں میں زبیرخان نیازی سے تعلق قائم ہوا۔
ملزم کے مطابق اس کے بعد ایڈووکیٹ سپریم کورٹ اعتراز احسن کے گھر بھی فائرنگ کرنا تھی۔ ملزم سنگین جرائم، اقدام قتل، بھتہ خوری، رابری اور لوگوں کے گھروں پر فائرنگ کے مقدمات کا سابقہ ریکارڈ یافتہ ہے۔ ملزم تھانہ ملت پارک کے اقدام قتل کے مقدمہ کا مفرور اشتہاری بھی ہے۔
