اسلام آباد: چیئرمین پاکستان پارلیمانی کمیٹی برائے کشمیر چیئرمین شہریار خان آفریدی نے اقوام متحدہ کے سکریٹری جنرل سے انسانی حقوق سے متعلق اقوام متحدہ کے ماہرین کی حالیہ رپورٹ پر کارروائی کرنے اور بھارت پر مقبوضہ جموں و کشمیر میں آبادیاتی دہشت گردی کرنے پر بھارت پر پابندیاں عائد کرنے کا مطالبہ کیا۔
ان خیالات کا اظہار انہوں نے نشتر میڈیکل یونیورسٹی ملتان میں ‘کاؤنٹرنگ ایکسٹریم بیہویئرز تھرو پرسپشن مینجمنٹ’ کے عنوان سے منعقدہ سیمینار کے شرکاء سے خطاب کرتے ہوئے کیا۔ شہریار خان آفریدی نے کہا کہ اقوام متحدہ کے سات ماہرین نے بھارت کی طرف سے جموں و کشمیر کی خودمختاری چھیننے اور اقلیتی حقوق کو پامال کرنے کے بارے میں ایک رپورٹ جاری کی ہے۔
اقوام متحدہ کے حقوق کے ماہرین نے کہا ہے کہ کشمیر کی خود مختاری اور اس کے نتیجے میں ہونے والی قانون سازی کے نقصان سے جموں و کشمیر کی آبادی کو خطرہ لاحق ہے۔ انہوں نے کہا کہ اقوام متحدہ کے ماہرین نے خبردار کیا ہے کہ ہندوستانی مداخلت سے مسلمانوں اور دیگر اقلیتوں کی سیاسی شراکت کو اثر انداز کیا جاسکتا ہے۔
ایمنسٹی انٹرنیشنل کا حوالہ دیتے ہوئے شہریار آفریدی نے کہا کہ انسانی حقوق سے متعلق عالمی اداروں نے بھارتی چھاپوں کے بارے میں ایک خوفناک یاد دہانی کروائے ہے کہ ہندوستان کی حکومت مقبوضہ جموں و کشمیر میں تمام متنازعہ آوازوں کو دبانے کے لئے پرعزم ہے۔
انہوں نے کہا کہ جموں و کشمیر کو اس کی خودمختاری چھیننے کے لئے آرٹیکل 370 اور 35 اے کو منسوخ کرنے کے فورا بعد ہی ہزاروں کشمیریوں کو گرفتار کیا گیا ، جن میں سیاست دان بھی شامل تھے اور اس غیرمعمولی سیاسی اقدام کے بعد انٹرنیٹ پر بھی پابندی لگا دی گئی۔ انہوں نے کہا کہ انٹرنیٹ دو سال بعد بحال ہوا جو کہ دنیا کا سب سے لمبا انٹرنیٹ لاک ڈاؤن ثابت ہوا۔
شہریار آفریدی نے کہا کہ تعلیم یافتہ نوجوان الجھن کا شکار ہے۔ انہوں نے کہا کہ ہمارے نوجوانوں کے لئے خود اعتمادی ضروری ہے ، نوجوانوں کو ایک روادار اور اعتدال پسند معاشرے کی تشکیل کے لئے پوری تندہی سے کام کرنا چاہئے۔ انہوں نے کہا کہ پاکستان ایشیاء میں اہمیت رکھتا ہے اور علاقائی اور عالمی رابطے اور تجارت کا مرکز ہے۔
انہوں نے کہا کہ دشمن پاکستانی نوجوانوں کے ذہنوں کو متاثر کر کے اُن کو اپنے مخالفانہ ڈیزائن کے طور پر استعمال کررہا ہے۔ انہوں نے کہا کہ اس معلوماتی دور میں دشمن پاکستان کے بارے میں جعلی خبروں کے ذریعے منفی پروپیگنڈے کو پھیلانے کے لئے جدید الیکٹرانک گیجٹ کا استعمال کررہا تھا۔ انہوں نے کہا کہ پاکستانی نوجوان قوم کو متحد کرنے کے لئےتبدیلی کے ایجنٹوں کی حیثیت سے کام کریں اور بڑے پیمانے پر عوام میں ملک کےلئے حُب الوطنی پیدا کریں۔
