لاہور: پنجاب حکومت نے لاہور کے شمال میں دبئی طرز کے مطابق نیا شہر بسانے کا فیصلہ کرلیا اور ریورراوی اتھارٹی کے قیام کی منظوری دے دی ،ایک لاکھ ایکڑاراضی پرنیا شہر کی تعمیرکی جائے گی۔ پنجاب حکومت نے نیا شہر بسانے کے لیے اتھارٹی قائم کرنے کی سفارش کردی، ذرائع کا کہنا ہے کہ اتھارٹی ایک لاکھ ایکڑ اراضی پر نیا شہر تعمیر کرے گی، نئے شہر کو دبئی طرز کے مطابق تعمیر کیا جائے گا۔
ابتدائی مرحلے میں شہر کے شمال میں نیا شہرآباد کیا جائے گا، وزیراعلی سردارعثمان بزدار نے لاہور کے شمال میں ایک لاکھ چھ ہزار ایکٹر پر نیا شہر آباد کرنے کی منظوری دے دی ہے۔ دبئی طرز پر بلند و بالا عمارتوں سے بسائے جانے والے اس شہر میں جدیدسہولیات فراہم کرنے کے ساتھ ساتھ خوبصورت جھیل اور بجلی کی سپلائی کیلئے تین بیراج تعمیر کئے جائیں گے۔ شہر کے قیام کیلئے ہاﺅسنگ آتھارٹی کے طرز پر راوی فرنٹ آتھارٹی قائم کی جائے گی، جس کے چیرمین وزیراعلی پنجاب ہوں گے۔
ذرائع کا کہنا ہے کہ منصوبے کی فعالیت دیکھتے ہوئے نجی شعبے کی جانب سے اس میں پانچ ہزار ارب روپے کی سرمایہ کاری کا عندیہ دیا گیا ہے ، جبکہ منصوبے میں نجی شعبے کی جانب سے شراکت داری کرنے والوں کو وزیراعظم کے تعمیراتی شعبے کیلئے دی جانے والی سہولیات کے پیکج سے بھی مستفید کیا جائے گا۔
ذرائع کے مطابق شہر کی تعمیر کیلئے قائم ہونے والی راوی فرنٹ آتھارٹی کے قیام کا آرڈینس بھی آج ہی جاری کردیا جائے گا۔ یاد رہے فروری میں وفاقی دارالحکومت میں نیا کمرشل شہر آباد کرنے کا منصوبہ تیار کیا تھا۔ وزیراعظم عمران خان نے”نیو بلیو ایریا” منصوبے کی منظوری دی تھی، ایف 9 پارک کے سامنے منصوبے کے لئے 170 کنال اراضی مختص کی گئی ہے۔ حکومت کی جانب سے فیصلہ کیا گیا تھا کہ اسلام آباد میں پہلی مرتبہ کمرشل اسپیس دگنی کردی جائے گی اور جدید تعمیرات پرمبنی کمرشل سٹی عالمی طرزپر تعمیر کیا جائے گا، منصوبےسےابتدائی طورپرحکومت کو 25 سے 30ارب روپےملیں گے۔
