کراچی: پڑوسی ملک سے عسکری تربیت یافتہ اور کراچی میں دہشتگردی کا منصوبہ بنانے والے دہشتگرد گرفتار، گرفتار ملزمان میں تحریک طالبان پاکستان کے اللہ نور اور سرفراز ، جبکہ القاعدہ برصغیر کے سلیم، جہانزیب اور امداد اللہ شامل ہیں۔ سی ٹی ڈی کے مطابق گرفتار ملزمان کے خلاف تھانہ سی ٹی ڈی میں مقدمات درج کر لئے گئے ہیں۔
محکمہ انسداد دہشت گردی سندھ اور وفاقی حساس اداروں نے کراچی کے مختلف علاقوں میں کالعدم تنظیموں کی موجودگی کی اطلاع پر مشترکہ کارروائیاں کیں جن کے دوران فتنہ الخوارج اور القاعدہ برصغیر کے پانچ کارندے گرفتار کر لیے گئے، سی ٹی ڈی سندھ کے افسر مظہر مشوانی کے مطابق ڈسٹرکٹ ویسٹ کے علاقے منگھو پیر اور ڈسٹرکٹ ایسٹ میں کشمیر روڈ پر نزد کے ایم سی اسپورٹس کمپلیکس انفارمیشن بیسڈ آپریشن کیا گیا، جس میں تحریک طالبان پاکستان کے اللہ نور اور سرفراز، جبکہ القاعدہ برصغیر کے سلیم، جہانزیب اور امداد اللہ کوگرفتار کیا گیا۔
سی ٹی ڈی افسر نے مزید بتایا کہ ملزمان کے قبضے سے غیر قانونی اسلحہ برآمد ہوا ہے جو فارنزک ٹیسٹ کیلئے بھیج دیا گیا ہے، گرفتار افراد پڑوسی ملک سے عسکری تربیت یافتہ ہیں اور کراچی میں دہشتگردی کی منصوبہ بندی کر رہے تھے جس پر ان سے مزید تفتیش کی جارہی ہے، سی ٹی ڈی افسر کے مطابق گرفتار ملزمان کے خلاف تھانہ سی ٹی ڈی میں غیرقانونی اسلحہ رکھنے کے مقدمات درج کرلیے گئے ہیں۔
