کراچی: جمعیت علماء اسلام سندھ نے سندھ حکومت کے 8 اگست تک لاک ڈاؤن کا فیصلہ مسترد کردیا۔ صوبائی سیکریٹری علامہ راشد محمود سومرو، مولانا عبدالکریم عابد، محمد اسلم غوری، مولانا محمد غیاث، سمیع سواتی ودیگر نے لاک ڈائون کی مذمت کردی۔
علامہ راشد محمود سومرو نے ردعمل میں کہا کہ لاک ڈاؤن کا اعلان عوام کا معاشی قتل عام ہے اور لاک ڈاؤن شہر میں بے روزگاری کا نیا طوفان لائے گا۔ لاک ڈاؤن دیہاڑی دار اور یومیہ اجرت والے مزدوروں کیلئے خودکشی کا پیغام ہے۔ سندھ حکومت لاٹھی گولی کی سرکار بننا چاہ رہی ہے اور ظلم و جبر پر مبنی فیصلے کاروباری حلقے اور عوام قبول نہیں کریں گے۔ 3 کروڑ آبادی والے شہر میں ویکسین لگانے پر حکومت توجہ کیوں نہیں دے رہی۔
