نوے دن میں کرپشن ختم کرنیوالوں نے 900 دنوں میں کرپشن کے ریکارڈز توڑ دیے، اسفند یار ولی خان

0
53

اسلام آباد: عوامی نیشنل پارٹی کے مرکزی صدر اسفند یار ولی خان نے کہا ہے کہ 90 دن میں کرپشن ختم کرنیوالوں نے 900 دنوں میں کرپشن کے ریکارڈز توڑ دیے۔ نام نہاد صادق اور امین کے دور حکومت میں کرپشن بڑھتی چلی جارہی ہے۔ ٹرانسپیرنسی انٹرنیشنل کی جاری کردہ درجہ بندی میں پاکستان کی تنزلی سے متعلق جاری بیان میں اے این پی سربراہ نے کہا ہے کہ دوسروں پر کرپشن کے بے جا الزامات لگانے والوں میں تھوڑی سی حیا ہو تو فوری مستعفی ہوجانا چاہئیے۔ٹرانسپیرنسی انٹرنیشنل کی رپورٹ نے ہمارے موقف کی تائید کی کیونکہ یہاں احتساب نہیں سلیکٹڈ احتساب جاری ہے۔ نیب احتساب نہیں سیاسی انتقام کا ادارہ ہے۔ صادق اور امین کے دورحکومت میں پاکستان کرپشن میں مزید چار درجے نیچے چلا گیا لیکن نیب کو حکومتی کرپشن نظر ہی نہیں آرہی۔

اسفندیارولی خان نے کہا کہ ترجمانوں کا ہجوم اب بھی عوام کو ماموں بنانے کی کوشش کررہے ہیں، عوام اب جاگ چکے ہیں۔ کوئی نیا منصوبہ نہیں لیکن کرپشن بڑھتی چلی جارہی ہے، کیا یہ نااہلی نہیں تو اور کیا ہے؟۔ اگر یہ مسلط حکمران رہے تو وہ دن دور نہیں کہ پاکستان 124سے 180 نمبر تک کا سفر طے کرے گا۔ انہوں نے مطالبہ کیا کہ اگر پاناما کیلئے جے آئی ٹی بن سکتی ہے تو کرپشن بڑھنے کی بھی تحقیقات ہونی چاہئیے۔دوسروں پر کیچڑ اچھالنے والے اب بھی ذمہ دار پچھلی حکومتوں کو ٹھہرارہے ہیں، شاید یہ انکی عادت بن چکی ہے۔عوام کو خود ان نااہلوں کے خلاف نکلنا ہوگا، یہ کرپٹ، نااہل، ناکام، نالائق اور ناجائز حکمران ہیں۔

جواب چھوڑ دیں

براہ مہربانی اپنی رائے درج کریں!
اپنا نام یہاں درج کریں