اسلام آباد: مہلک وائرس کو وِڈ 19 کے باعث ملک بھر میں گزشتہ چوبیس گھنٹوں کے دوران مزید 144 افراد انتقال کر گئے۔
این سی او سی نے کہا ہے کہ ملک میں 24 گھنٹوں میں کرونا کے مزید ایک سو چوالیس مریض انتقال کر گئے، ملک میں کرونا سے انتقال کرنے والوں کی تعداد 16 ہزار 842 ہو گئی۔
نیشنل کمانڈ اینڈ آپریشن سینٹر کی رپورٹ کے مطابق گزشتہ چوبیس گھنٹوں کے دوران کرونا کے 5 ہزار 870 نئے کیسز سامنے آئے، ملک میں اب تک مجموعی طور پر کرونا کے 7 لاکھ 84 ہزار 108 کیسز کی تصدیق کی جا چکی ہے۔
کرونا کے 6 لاکھ 82 ہزار 290 مریض صحت یاب ہو چکے ہیں، جب کہ 4 ہزار 652 مریضوں کی حالت تشویش ناک ہے، ملک میں فعال کیسز کی تعداد 84 ہزار 976 ہے۔
24 گھنٹوں میں 53 ہزار 818 کرونا ٹیسٹ کیے گئے، جب کہ ملک میں گزشتہ روز کرونا کے ٹیسٹ مثبت آنے کی شرح 10.90 فی صد رہی، اور مجموعی طور پر اب 1 کروڑ 14 لاکھ 31 ہزار 241 کرونا ٹیسٹ کیے جا چکے ہیں۔
پنجاب میں کرونا کیسز کی تعداد بڑھ کر 2 لاکھ 82 ہزار 469 ہو گئی ہے، سندھ میں کیسز کی مجموعی تعداد 2 لاکھ 75 ہزار 815 ہے، خیبر پختون خوا میں کیسز 1 لاکھ 10 ہزار 875 ہو گئی، بلوچستان میں 21 ہزار 365 کیسز، اسلام آباد میں 72 ہزار 150 کیسز، آزاد جموں و کشمیر میں 16 ہزار 193 کیسز، جب کہ گلگت بلتستان میں اب تک 5 ہزار 241 کیسز سامنے آ چکے ہیں۔
