کراچی(رپورٹ: ایم جے کے) سندھ کے سینئر وزیر شرجیل انعام میمن نے صوبے بھر میں جرائم پیشہ افراد کے خلاف کارروائیوں پر سندھ پولیس کی تعریف کرتے ہوئے کہا کہ یکم مارچ تا 15 مارچ 2025 کے دوران، دو ہفتوں میں سندھ پولیس نے 143 مقابلےکیے، 283 مجرموں کو گرفتار، 68 گینگز کو ختم کیے گئے، کارروائیوں میں 18 بدنام جرائم پیشہ افرادمارے گئے، 1,706 مجرموں، 27 پاتھاریداروں کو گرفتار کر لیا گیا، سندھ پولیس نے 592 اشتہاری مجرموں اور 1,471 مفروروں کو کامیابی سے گرفتار کیا۔
انہوں نے کہا کہ شکارپور کے کچے میں، پولیس نے دو ڈاکو کو ہلاک کیا، اور ڈاکوؤں کے پانچ ٹھکانے مسمار کر دیے گئے، مجرموں کے زیر استعمال کشمور کے کچے میں 20 ٹھکانے اور گھوٹکی کے کچے میں دو ٹھکانے مسمار کر دیے گئے، اسٹریٹ کرائم کے خلاف کارروائیوں میں 11 مجرم مارے گئے، 1,355 گرفتاریاں کی گئیں، پولیس کی کارروائیوں نے شکارپور، کشمور اور گھوٹکی میں مجرموں کو نمایاں طور پر کمزور کیا ہے۔
ایک بیان میں سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ پولیسنگ کی جارحانہ حکمت عملی نے صوبے میں مجرمانہ سرگرمیوں کو روکنے میں اہم کردار ادا کیا ہے، حکومت سندھ مکمل طور پر پُر عزم ہے کہ کوئی بھی مجرم انصاف سے بچ نہ پائے، سندھ میں جرائم کی کوئی جگہ نہیں ہے، سندھ جرائم سے پاک اور ایک پرامن اور خوشحال صوبہ بننے جا رہا ہے۔
انہوں نے کہا کہ عوام پولیس کے ساتھ تعاون کریں اور حکومت اپنے شہریوں کے لیے سندھ کو مزید محفوظ بنانے کے لئے پرعزم ہے، وہ مجرم برسوں سے انصاف سے چشم پوشی کر رہے تھے اب جیل کے سلاخوں کے پیچھے ہیں، عوام کی جان و مال کا تحفظ ہماری اولین ترجیح ہے، کوئی بھی قانون سے بالاتر نہیں۔
سینئر وزیر شرجیل انعام میمن نے مذید کہا کہ حکومت سندھ اسٹریٹ کرائم کی لعنت کے خاتمے کے لیے اپنی انتھک کوششیں جاری رکھے گی، سندھ کے امن و استحکام کو خطرے میں ڈالنے والے کسی بھی عنصر کو برداشت نہیں کیا جائے گا۔
انہوں نے کہا کہ ہماری پولیس فورس فعال طور پر جرائم پیشہ نیٹ ورکس کو ختم کر رہی ہے، آخری مجرم کو انصاف کے کٹہرے میں لانے تک چین سے نہیں بیٹھیں گے، سڑکوں، شاہراہوں اور دیہی علاقوں کو پرامن اور محفوظ بنانے کے لئے حکومت سندھ کی جانب سے تمام ممکنہ اقدامات کئے جارہے ہیں۔
