کراچی: عوام پاکستان پارٹی سندھ کے سیکریٹری اور نیشنل آرگنائزنگ کمیٹی کے رکن، ناصر الدین محمود نے کہا ہے کہ حکومت نے دریائے سندھ پر نئی چھ کنالز کی تعمیر کے منصوبے کا اعلان کرکے سندھ میں بے چینی پیدا کردی ہے۔ انہوں نے کہا کہ حکومت قوم کے اتحاد کو نقصان پہنچانے کے مجرمانہ اقدام کی مرتکب ہورہی ہے۔
انہوں نے کہا کہ سندھ کے عوام کی مرضی کے بغیر کوئی منصوبہ قومی یکجہتی کو پارہ پارہ کرنے کے مترادف ہوگا۔ ناصر الدین محمود نے کہا ہے کہ حکمران اتحاد میں شامل تمام سیاسی جماعتیں سندھ کےعوام کے سوالات کا واضح اور دوٹوک جواب دینے کے بجائے بے معنی تاویلیں پیش کررہی ہیں ۔ انہوں نے کہا کہ “عوام پاکستان پارٹی” پاکستان کے عوام کی آواز ہے اور وہ ہر صورت سندھ سمیت تمام صوبوں کے مفادات کے خلاف کسی بھی قسم کی کارروائی کی بھر پور مخالفت اور مزاحمت کرے گی۔
انہوں نے کہا کہ موجودہ حکومت اس منصوبے کے تحت غریب کسان کو بے زمین کرکے اُن کی زمینیں کارپوریٹ فارمنگ منصوبے کے تحت بڑے صنعتی و تجارت اداروں کو دینے کامنصوبہ بنارہی ہے، جس کی ہر سطح پر مخالفت کی جائے گی۔ انہوں نے کہا کہ اس کے نتیجے میں کسانوں میں بھی شدید بے روزگاری اور غربت پھیلے گی “عوام پاکستان پارٹی” ایسے ہر اقدام کی بھرپور مخالفت کرے گی۔ ناصر الدین محمود نے کہا کہ آج جبکہ صوبہ خیبرپختونخواہ اور صوبہ بلوچستان میں پہلے ہی حالات درست نہیں اُس موقع پر صوبہ سندھ میں ایک متنازع منصوبے پر اتفاقِ رائے پیدا کئے بغیر ہی کام کا آغاز کردینا کسی صورت دانش مندی نہیں ہے۔
انہوں نے مطالبہ کیا کہ نئی چھ کنالز تعمیر کرنے کے منصوبے پر فی الفور کام بند کرکے سندھ کے عوام کے تحفظات دور کئے جائیں۔ ناصر الدین محمودنے کہا کہ اتفاقِ رائے پیدا کرنے کا کام یہ متنازع اورغیر نمائندہ پارلیمنٹ ہرگز نہیں کرسکتی لہذا اس منصوبے کو آئندہ انتخابات تک مؤخر کیا جائے۔
انہوں نے کہا کہ نئے انتخابات کے نتیجے میں معرِضُ الوجود میں آنے والی پارلیمنٹ ہی قومی اتفاقِ رائے پیدا کرنے کےلیے اپنا قومی کردار ادا کرے۔
