کراچی (رپورٹ: ایم جے کے) کراچی کے پوش علاقوں سے لگژری گاڑیاں چھینے والے گینگ کا سرغنہ پولیس کانسٹیبل رانا کاشف گرفتارکر لیا گیا، مشہور ٹی وی ایکٹریس سے چھینی گئی ٹویوٹا فورچونر، فیروزآباد کے علاقے سے چھینی گئی سوزوکی آلٹو، سرکاری اسلحہ و منشیات برآمد کر لی گئی، ملزم نے کراچی کے پوش علاقوں سے دو درجن سے زائد گاڑیاں چھیننے کا اعتراف کیا ہے۔
اے وی ایل سی، سی آئی اے نے شہر کے پوش علاقوں سے لگژری گاڑیاں چھینے والے گینگ کا سرغنہ پولیس کانسٹیبل رانا کاشف گرفتارکر لیا گیا چوری/چھینی گئی گاڑیاں گینگ کے دیگر ساتھیوں کے ذریعہ بلوچستان میں فروخت کی جاتی ہیں، ملزم رانا کاشف کی ڈیوٹی فارن سیکیورٹی سیل میں ہے، اس دوران ملزم کاشف نے کئی مختلف کاروائیاں کیں جن میں گزشتہ سال 26 جون کو دارالسلام سوسائٹی کورنگی سے اپنے ساتھیوں کے ہمراہ ٹویوٹا فورچونر رجسٹریشن نمبر بی ایم-0480 چھینی تھی جس کی واضح سی سی ٹی وی ویڈیو مو جود ہے جبکہ ملزم نے گزشتہ سال ہی 7 اکتوبر 2024 کو بخاری کمرشل فیز 6، ڈیفنس سے اپنے ساتھیوں کے ہمراہ ایک وائٹ ٹویوٹا فورچونر رجسٹریشن نمبر بی کے-0637 چھینی تھی جو کہ کوئٹہ پولیس نے بعد پولیس مقابلہ گینگ کے ایک ساتھی ایوب ولد لال زادہ کو گرفتار کر کے بر آمد کر لی ہے۔
ملزم کاشف نے پچھلے مہینے 6 فروری کو 26 اسٹریٹ خیابان محافظ سے اپنے ساتھیوں کے ہمراہ مشہور ٹی وی ایکٹریس مومینا اقبال کی ٹویوٹا فورچونر رجسٹریشن نمبر بی بی کے-9 چھینی جس کی رپورٹ تھانہ درخشاں میں درج کی گئی تھی، ملزم سے برآمد شدہ سوزوکی آلٹو ملزمان نے گذشتہ سال فیروزآباد کے علاقے سے اسلحہ کے زور پر چھینی تھی، اس کے علاوہ ملزم کاشف نے دو درجن سے ذائد مزید وارداتوں کا انکشاف کیا ہے جن کی تلاش جاری ہے۔
ایس ایس پی اے وی ایل سی، سی آئی اے بشیر احمد بروہی کا کہنا ہے کہ ملزم کاشف کے دیگر ساتھیوں اور مزید گاڑیوں کی برآمدگی کے لئے چھاپے مارے جارہے ہیں، گرفتار ملزم سے مزید تفتیش جا ری ہے اہم انکشافات متوقع ہیں۔
