کراچی (رپورٹ: ایم جے کے) میئر کراچی بیرسٹر مرتضیٰ وہاب نے کہا ہے کہ اظہار رائے کی آزادی میں صحافیوں اور ان کی تنظیموں کا اہم کردار رہا ہے، خالقدینا ہال میں پی ایف یو جے کی پلاٹینیئم جوبلی کی یادگار قائم کی جائے گی تاکہ آنے والی نسلوں کو تحریک پاکستان کے رہنماؤں کے ساتھ ساتھ صحافی برادری کی جمہوریت اورآزادی اظہارکے لئے دی جانے والی قربانیوں اور خدمات سے روشناس کرایا جاسکے۔ان خیالات کا اظہار میئر کراچی نے کے یو جے اور پی ایف یو جے کے عہدیداروں اور صحافیوں کی ایک بڑی تعداد کے ساتھ یادگار کا سنگ بنیاد رکھنے کی تقریب سے خطاب کرتے ہوئے کیا، اس موقع پر کے یو جے کے صحافیوں کی ایک بڑی تعداد موجود تھی۔
میئر کراچی بیرسٹر مرتضیٰ نے کہا کہ ایک سیاسی کارکن ہوں لیکن صحافتی گھرانے سے تعلق ہونے کی بنیاد پر میرا صحافی برادری سے گہرا رشتہ ہے، اس یادگار کو میں ذاتی اخراجات سے تعمیر کراؤں گا اور اگر اخراجات زیادہ ہوئے تو کے ایم سی کے فنڈز سے تعمیرکریں گے۔
انہوں نے کہا کہ جمہوریت، اظہار رائے کی آزادی کے لئے صحافیوں کا بڑا کردار ہے، آنے والی نسلوں کے لئے ہمیں ایک بہترین کراچی چھوڑ کر جانا ہے، صحافت ریاست کا چوتھا ستون ہے، مایوسی اور ناامیدی چھوڑ کر قلم کے ذریعے جدوجہد جاری رکھنی ہے، صحافی برادری کا معاشرے کی اصلاح میں اہم کردار ہے، پی ایف یو جے کی پلاٹینیئم جوبلی کے مونومنٹ کو شاندار طریقے سے تعمیر کروائیں گے، اخبارات، چینلز اور سوشل میڈیا ابلاغ عامہ کے لئے انتہائی اہم کردار ادا کرتے ہیں، میئر کراچی نے کہا کہ صحافی برادری کو جو مسائل درپیش ہیں کے ایم سی ترجیحی بنیادوں پر انھیں حل کرے گی، انہوں نے کہا کہ صحافیوں اور بلدیاتی قیادت کا چولی دامن کا ساتھ ہے، اخبارات اور چینلز کے ذریعے شہر کے مسائل ہم تک پہنچتے ہیں جنہیں ترجیحی بنیادوں پر حل کرنے کی کوشش کی جاتی ہے، انہوں نے کہا کہ تحریک پاکستان ہو یا تعمیر پاکستان صحافی برادری نے ہمیشہ اپنا مثبت کردار ادا کیا ہے اور آئندہ بھی کرتے رہیں گے، میئر کراچی نے کہا کہ میرا تعلق صحافی گھرانے سے ہے میری کوشش ہوتی ہے کہ صحافی برداری سے اپنا یہ تعلق برقرار رکھوں۔
انہوں نے کہا کہ میرے والد وہاب صدیقی پوری زندگی صحافت کرتے رہے اور میری والدہ جب کے ایم سی کی کونسل کی ممبر بنی تو انہوں نے بھی میڈیا کمیٹی کا ہی انتخاب کیا اور خدمات انجام دیں، کے یو جے کے صدر طاہر حسن، سیکرٹری لیاقت کشمیری اور اراکین مجلس عاملہ نے میئر کراچی کو تقریب میں خوش آمدید کہا اور پلاٹینم جوبلی کی تقریب میں بھرپور تعاون کرنے پر شکریہ ادا کیا، اس موقع پر میئر کراچی بیرسٹر مرتضیٰ وہاب کو کے یو جے کی جانب سے یادگاری شیلڈ اور مجلہ پی ایف یو جے پیش کیا گیا۔
