کراچی (رپورٹ: ایم جے کے) الیکشن کمشن آف پاکستان کے جاری کردہ نوٹیفکیشن کے مطابق صوبہ سندھ کے 19 اضلاع میں 52 خالی نشستوں پر ضمنی بلدیاتی انتخابات کا شیڈول جاری کردیا گیا ہے۔
جاری کردہ نوٹیفکیشن کے مطابق ضلع شکارپور، کشمور، گھوٹکی، سکھر، نوشہروفیروز، دادو، حیدرآباد، جامشورو، بدین، میرپورخاص، ٹھٹھہ، مٹیاری، خیرپور، سجاول، ٹنڈو الہیار، عمرکوٹ سمیت کراچی ڈویژن کےتین اضلاع کراچی غربی، کیماڑی اور کراچی شرقی میں ضمنی بلدیاتی انتخابات مورخہ 9 ستمبر کو منعقد ہوں گے۔
اس ضمن میں، 20 اگست کو متعلقہ ریٹرننگ افسران پبلک نوٹس جاری کریں گے جبکہ کاغذات نامزدگی وصول و جمع کروانے کا مرحلہ 21 تا 23 اگست تک جاری رہے گا اور 25 اگست کو امیدواروں کی ابتدائی فہرست جاری کی جائے گی، کاغذات نامزدگی کی جانچ پڑتال 26 تا 28 اگست تک ہوگی، 30 اگست سے 2 ستمبر تک ریٹرننگ افسران کے فیصلوں کے خلاف اعتراضات جمع کروائے جاسکیں گے، 6 ستمبر کو امیدواروں کی حتمی فہرست شایع کی جائے گی۔
امیدواروں کی جانب سے کاغذات نامزدگی 8 ستمبر تک واپس لیے جاسکیں گے، 9 ستمبر کو امیدوارں کو انتخابی نشان الاٹ کیئے جائیں گے، جبکہ 24 ستمبر بروز جمعہ پولنگ کا انعقاد کیا جائے گا۔
الیکشن کمیشن نے ضمنی بلدیاتی انتخابات کے لیے ڈسٹرکٹ ریٹرننگ افسران اور ریٹرننگ افسران کا تقرر بھی کردیا ہے، الیکشن کمیشن آف پاکستان کے احکامات کی روشنی میں ضمنی بلدیاتی انتخابات کے حلقوں میں وفاقی و صوبائی انتظامیہ پر ترقیاتی منصوبوں کے اعلان اور سرکاری وسائل کے استعمال پر پابندی ہوگی اور ساتھ ہی اُن انتخابی حلقوں میں تمام سرکاری افسران کے تبادلوں اور تعیناتی پر انتخابات کے انعقاد تک پابندی عائد رہے گی۔
