لاہور : امریکہ میں مقیم پاکستانی اداکارہ میرا کو پاگل قرار دے کر پاگل خانے داخل کروا دیا گیا ہے۔ یہ بات ان کی والدہ نے اپنے ویڈیو بیان میں کہی۔
اس حوالے سے اداکارہ میرا کی والدہ شفقت زہرہ بخاری نے ایک ویڈیو جاری کی ہے جس میں ان کا کہنا ہے کہ میرا کو امریکا میں پاگل خانے میں داخل کرا دیا گیا ہے۔
پانچ اپریل کو میری بیٹی نے فون کرکے بتایا کہ اسے پاگل خانے لے جارہے ہیں، میرا نے بتایا کہ وہ چیختی چلاتی رہی کہ وہ پاگل نہیں ہے لیکن پھر بھی اسے لے جایا گیا۔
والدہ اداکارہ میرا نے وزیراعظم عمران خان سے اپیل کی ہے کہ میری بیٹی کو بازیاب کرایا جائے، میری بیٹی پاگل نہیں اس دنیا میں وہی میرا ایک سہارا ہے۔
ذرائع کا کہنا ہے کہ اداکارہ میرا جو ان دنوں امریکہ میں مقیم ہیں اور کورونا ویکسی نیشن کے بعد بخار محسوس کر رہی تھیں جس کے بعد وہ اپنا طبی معائنہ کرانے کیلئے ڈاکٹر کے پاس گئیں تو وہاں فالتو باتیں شروع کردیں۔
ذرائع کے مطابق اداکارہ نے کہا کہ وہ ایک شوبز اسٹار ہیں لہٰذا خصوصی پروٹوکول دیا جائے، کیا آپ جانتے نہیں کہ میں کون ہوں، میرا وی آئی پی طور پر چیک اپ کیا جائے۔
پاکستانی اداکارہ کی بدتمیزی بڑھی تو ڈاکٹر نے ان پر واضح کیا کہ آپ شوبز اسٹار ہوں گی، لیکن میں اصول کے مطابق ہی مریضوں کو دیکھتا ہوں، تاہم اداکارہ کی جانب سے اوٹ پٹانگ باتیں جاری رہیں تو ڈاکٹر نے ذہنی امراض کے سینٹر فون کرکے عملے کو طلب کرلیا۔
ذرائع کا کہنا ہے کہ تمام صورتحال کو دیکھتے ہوئے اداکارہ میرا نے اپنی غلطی تسلیم کر لی ہے۔
