جدہ (شین نون) وفاقی وزیر منصوبہ بندی احسن اقبال نے کہا ہے کہ ہمیں سیاسی لانگ مارچوں کو خیر باد کہہ کے اقتصادی لانگ مارچ کرنا ہے، قوموں کے تعلقات کو اقتصادی رشتے ہی لازوال بنیادیں فراہم کرتے ہیں، وہ جدہ میں پاکستان بزنس کمیونٹی کے عید ملن عشائیہ سے خطاب کررہے تھے، جس میں بڑی تعداد میں پاکستان کمیونٹی نے شرکت کی۔
وفاقی وزیر نے سعودی عرب میں پاکستانی کمیونٹی کو ہدایت کی کہ پاکستان اور سعودی عرب کے درمیان تجارتی روابط بڑھانے میں ٹھوس کردار ادا کرے، انہوں نے کہا کہ اڑان پاکستان کے پانچ نکاتی ایجنڈے میں برآمدات کے فروغ کو مرکزی اہمیت حاصل ہے، ہماری معاشی خودمختاری کا انحصار معیشت کی مضبوطی پہ ہے، وزیر اعظم شہباز شریف نے معیشت کو ۔ڈھلوان کا رُخ اڑان کی جانب موڑ دیا ہے، ہر پاکستانی کا فرض ہے کہ اپنی پوری صلاحیتیں معاشی اڑان کی کامیابی کے لئے وقف کردے۔
وفاقی وزیر کا کہنا تھا کہ بیرون ملک مقیم پاکستانی قوم کا قیمتی سرمایہ ہیں، انہوں نے کہا کہ دنیا ٹیکنالوجی کی بدولت تیزی سے بدل رہی ہے، ہمیں بھی خود کو بدلنا ہوگا، تحقیق اور ٹیکنالوجی کے شعبوں میں مسلمان پیچھے رہ گئے ہیں۔
انہوں نے کہا کہ ملک کی ترقی کے لئے قومی یکجہتی، یگانگت اور اتحاد ناگزیر ہیں، ایک سیاستداں نے پاکستانی قوم کو دنیا میں چور ڈاکو بنا کر پیش کیا جبکہ پاکستانی قوم کی اصل شناخت اس کی محنت اور ذہانت ہے، ہمیں محنت، ذہانت،دیانت اور اعلیٰ معیار سے پاکستانی برانڈ دنیا میں منوانا ہے۔
احسن اقبال کا کہنا تھا کہ پاکستان کو خدا نے کھربوں ڈالر کے معدنیات سے نوازا ہے، حکومت نے بلوچستان میں معدنیات کی ترقی کے منصوبے شروع کئے ہیں اس عمل سے بلوچستان کی ترقی کے دشمنوں کی نیندیں اڑ گئی ہیں، بلوچستان ترقی کرے گا اور پاکستان کا خوشحال ترین صوبہ بنے گا۔
احسن اقبال کا کہنا تھا کہ ہمارے دیگر ممالک سے پیچھے رہنے کی وجہ سیاسی بے یقینی اور پالیسیوں کا عدم تسلسل ہے، ہمیں اپنی غلطیوں سے سیکھ کر ملک میں دوبارہ عدم استحکام پیدا نہیں ہونے دینا۔ حکومت نے دو لاکھ نوجوانوں کی سالانہ آئی ٹی میں تربیت کا پروگرام شروع کیا ہے، ایک ہزار زرعی ماہرین کو جدید زراعت کی تربیت کے لئے چین بھیجا جا رہا، ہم 2035 تک پاکستان کو ایک کھرب ڈالر کی معیشت بنانے کا عزم رکھتے ہیں، پاکستان ہماری پہچان اور وطن ہے، اس پہ آنچ نہیں آنے دیں گے۔
انکا مزید کہنا تھا کہ پاکستان کو درپیش موسمیاتی تبدیلی سے نبٹنے کے لئے گرین انقلاب 2.0 پہ بھیکام کر رہے ہیں، ہمیں پانی اور خوراک کی سیکیورٹی کے چیلنجز درپیش ہیں، آبادی کی بڑھتی رفتار کو روکنے اور تعلیم و صحت کے پروگراموں کو ترجیح دے رہے ہیں۔
تقریب کا اہتمام مسلم لیگ ن کے جنرل سیکریٹری ملک منظور حسین نے کیا تھا، جس میں پاکستان قونصل جنرل خالد مجید نے بھی شرکت، کی تقریب سے بزنس کمیونٹی کے افضل جٹ اور دیگر نے بھی خطاب کیا۔
